O Ames perde ante a Sionlla tras catro disparos ao poste nun partido frouxo (2-3)

O Ames prosegue a súa mala racha de resultados cunha derrota ante a Sionlla, que estivo máis acertada no remate, sobre todo coa cabeza, mentres o Ames golpeou ata catro veces no poste. O encontro comezou co Ames mellor posicionado e levando a manixa do xogo. As ocasións foron chegando con boas xogadas entre Nito, Miki e Llello. Varios remates cruzados non acabaron de ver portería, e o Ames encadeou varios córners de xeito case consecutivo. A Sionlla chegou nun par de contras sen demasiado perigo. Tras varios avisos, o Ames adiantouse no marcador. Unha boa combinación derivou nun tiro de Nito ao pao, que Llello remachou ao fondo das mallas. A ledicia pouco lle durou ao Ames, xa que uns cinco minutos despois, un córner en contra derivou nun cabezazo inapelable do home máis alto dos visitantes. Co empate, o equipo perdeu seguridade, e o xogo deixou de ser de toque e pasou a basarse no pase longo. A Sionlla chegaba máis e nunha desas xogadas o colexiado pitou penalti. Roi adiantouse na área a un rival, que cando se dipoñía a disparar, "rematou" a perna de Roi caendo ao chan, e o árbitro sinalou pena máxima. A Sionlla anotou o segundo gol, e acto seguido o seu capitán encarouse co lanzador, que non era o designado polo adestrador. Trala pelexa foron separados polos seus compañeiros, e expulsados polo colexiado, que pitou o final da primeira metade cinco minutos antes do tempo estimado, quizais para que se calmasen os ánimos dos xogadores visitantes. Na reanudación, o Ames saíu autopresionado e tardou uns quince minutos en centrarse para intentar aproveitar a vantaxe numérica. A Sionlla encerrouse cos seus nove homes na súa área, e o Ames comezou o seu monólogo. Entrando polas bandas e colgando balóns intentouno unha e outra vez, con tres homes atrás que en ocasións eran dous. Nunha das escasas contras visitantes, un novo cabezazo tras unha falta lateral deulle o terceiro á Sionlla, que rentabilizou ao máximo os seus remates. O Ames medrou coa entrada de Juansiño, Chete e Paco e comezou o festival de postes e "huys". Miki adentrouse pola esquerda e o seu centro pasado foi picado coa cabeza por Llello e rexeitado polo porteiro "in extremis". Nunha internada pola esquerda, Juansiño foi derrubado xusto cando entraba na área e o árbitro sinalou penalti. Diego encargouse de transforma-lo, e o Ames lanzou a polo empate. Chete puido consegui-lo nunha bolea que o porteiro sacou da escadra enviando a córner. Juansiño internouse na área e o seu disparo na esquina da área pequena deu no pao. Llello aproveitou unha deixada de Miki para bolear ao poste. Fran lanzou un disparo lonxando que se foi rozando o longueiro. Paco e Roi lanzaron desde lonxe pero a nutrida defensa visitante repeliu os lanzamentos. E o árbitro puido sinalar un novo penalti máis claro que o anterior sobre Juansiño. Pero cando a pelota se empeña en non entrar e o rival anota todo o que remata, pouco se pode facer, aínda que sexa contra nove. Incrible a racha que levamos.