O Ames cae derrotado na Sionlla nun campo impracticable (6-3)

A Sionlla infrinxiu a terceira derrota da temporada ao Ames nunha visita a un dos peores campos da categoría, que desta volta presentaba unhas condicións pésimas. Os locais marcarían pronto, logo de que o colexiado sinalase penalti por man de Gamarra na área, aparentemente involuntaria. Co marcador abaixo, o Ames comezou a dominar e pronto chegaron as ocasións, as máis claras un disparo de Roi tras deixada de Nito, unha falta perigosa lanzada por Miki e unha internada de Nito que o mal estado do campo truncou. Pero o gol non chegou e a Sionlla anotaría o dous a cero tras unha internada pola banda dereita. O Ames intentábao e puido reducir distancias desde o punto de penalti, pero o lanzamento de Nito golpeou no longueiro. Pouco despois a Sionlla marcaría o terceiro, mermando os ánimos do Ames. Antes do descanso, a Sionlla quedaría con dez homes tras unha patada a Miki sen balón dun dos seus xogadores (a posteriori castigado con 6 partidos de suspensión), lesionando ao mediocampista amiense. Fran enchería de esperanza ao Ames marcando o 3-1 cun bo disparo dentro da área, prolongando a súa racha goleadora con tres tantos en tres partidos consecutivos. Na reanudación, o Ames intentaría a remontada con certa ansiedade, pero nunha contra a Sionlla ía anotar o cuarto gol. Pero o Ames non se veu abaixo e tras encaixar o 4-1 chegaron os seus mellores momentos, rozando a remontada. O 4-2 anotaríao Roi, que se internou pola banda, disparando ao primeiro pao, entrando o esférico na portería coa axuda dun defensor. Ante o tanto amiense, a Sionlla púxose nerviosa, e tras un mal saque do seu porteiro, Moncho recibiu uns metros fóra da área e cunha gran vaselina poñía o 4-3 no marcador. O empate puido chegar nas botas de Adrián, que lanzou un tiro bombeado ao longueiro. A puntilla para o Ames chegaría nun córner no que o dianteiro local remata só no segundo pao, e Adrián non acerta a despexar, colándose o balón na meta visitante. Co Ames arriscando para achegarse no marcador, a Sionlla marcaría o sexto gol tras un pase entre liñas no que o dianteiro local quedou só ante Juan, que nada puido facer. Ao final, resultado demasiado abultado para a Sionlla, que afrontaba o encontro con cinco expulsados e con serias dúbidas na súa aliñación, onde algúns nomes non coincidían cos dorsais. Por iso, o Ames presentou na Federación a correspondente reclamación por aliñación indebida, que está sendo estudiada nestes momentos. Con todo, a derrota deixa ao Ames oitavo con seis puntos en cinco xornadas. Agora toca o Chaián!!