O Ames derrota á Sionlla e rompe a súa mala racha (3-1)

O Ames afrontaba o partido contra o penúltimo clasificado, a Sionlla, coa necesidade de levarse os tres puntos. Os inicios foron abertos, cos dous equipos chegando sen perigo. O Ames conseguiu entrar entonado nun encontro por terceira vez consecutiva, tralos bos encontros ante o Ortoño e o Paraguayo Santiago. Sen embargo, á media hora a Sionlla sería quen de poñerse por diante no marcador. Á saída dun córner e tras varios rexeites, o interior visitante dispara desde fóra da área e o balón entra cruzado tras pasar entre varios xogadores. Os visitantes puideron anotar o segundo nun balón en longo que deixou só ao dianteiro ante un Juan que conseguiu tocar o remate e enviar o esférico a córner. Na primeira parte, o Ames tamén tería dúas boas ocasións. A primeira, unha falta rasa botada desde o lateral por Gamarra, que Adrián deixa pasar entre as pernas para acabar atallando o porteiro da Sionlla. A segunda sería tamén unha falta lateral, lanzada por Adrián, que pasa a escasos centímetros de Chete, no punto de penalti. Cando parecía que o balón se colaba na meta, o gardamallas visitante evitouno, e Juansiño non foi quen de rematar a gol o rexeite. A Sionlla chegaría ao descanso cun xogador menos, por lesión e ante a falta dun recambio no banquillo. Polo Ames, no descanso entraron Nito e Neo, tras moitos partidos alonxados dos terreos de xogo por lesión. O Ames saíu máis metido na reanudación. Un balón en longo que peina Neo a pique estivo de supoñer o empate, pero o remate de Adrián foi desviado coa perna polo porteiro da Sionlla. O Ames conseguiría o empate aos dez minutos da segunda parte. Juansiño recolle un balón dividido na frontal da área. O seu disparo bate no longueiro e Neo, moi atento, remata o rexeite coa cabeza establecendo a igualada. Tralo gol, o encontro xa sería completamente do Ames, ante unha Sionlla decaída. Neo, Fran e Adrián volverían ter ocasións para adiantar aos locais, pero non tiveron fortuna nos remates. Nito tamén tivo unha ocasión clarísima. Tras regatear ao porteiro no interior da área, o seu remate é despexado baixo paos por un defensor da Sionlla. Nito e Neo marcarían os dous goles que lle darían finalmente a victoria ao Ames. Nito nun remate dentro da área e Neo tras rozar a pelota logo dun saque de falta desde o lateral efectuado por Gamarra. Deste xeito, con sufrimento, o Ames acadaría a súa terceira victoria da temporada, todas elas en Castiñeiro do Lobo. A vindeira semana, o Ames xoga en Chaián, o domingo ás 12 e media do mediodía. Noraboa, e a seguir así!!!