Derrota do Ames ante o Chaián (2-1)

O Ames caeu derrotado por 2 goles a 1 na súa visita a Chaián do pasado domingo. Os amienses desputaron un bon encontro, serios en defensa e moi ben colocados no campo. Na primeira parte só houbo unha coasión para cada equipo. O Chaián intentaba tocar desde atrás, pero o Ames presionaba ben, obrigando aos locais a buscar aos seus dianteiros con balóns en longo. A defensa visitante estaba moi cómoda e despexaba sen problema. En ataque, o Ames agardaba chegar á contra, e nun dos poucos achegamentos foi que de adiantarse. Miki recolleu un rexeite ao borde da área e disparou a porta. O seu lanzamento foi desviado por un defensor local, e o esférico cambiou a súa traxectoria deixando ao porteiro a contrapé. O Ames chegaría ao descanso co 0-1 ao seu favor. E iso que o Chaián tivo unha oportunidade moi clara antes do remate da primeira metade. Un balón en longo pillaría saíndo á defensa do Ames, quedando un dos atacantes locais só ante Juan. O seu remate de vaselina daría no longueiro e perderíase pola liña de fondo. Na segunda parte o Ames sairía un pelín despistado e o Chaián máis enchufado. O empate para os locais chegaría aos 10 minutos da reanudación. Un dos homes de banda do Chaián collería o balón no lateral e cruzando cara á área visitante batería a Juan cun disparo raso e duro. Tralo empate o Ames chegaría máis arriba e tería máis manexo de balón, pero sería o Chaián o que se adiantase a falta de quince minutos para o remate do encontro nun gol calcado ao primeiro, pero polo pao contrario. Finalmente o Chaián levouse os tres puntos, pero o Ames tralo visto nos últimos encontros está plantexando os encontros dun xeito máis serio. O vindeiro partido será o domingo fronte ao Trazo en Castiñeiro do Lobo.