Festival de goles entre Ames e Vila de Ordes en Castiñeiro (3-6)

Resultado aos sete minutos: 0-3. Non se pode pedir máis a un inicio de partido. Quizais si, que os tres goles fosen a favor e non en contra do Ames. O caso é que o domingo o Ames saíu novamente durmido e ao Vila de Ordes saíalle todo. Un remate espectacular desde fóra da área que se cola pola escuadra, un disparo raso cruzado desde a frontal da área e un remate de cabeza. O Ames tardou en dixerir o resultado, pero tralos minutos de incertidume meteuse na contienda cun gol de Nito, que superou cunha picada ao porteiro visitante na súa saída. Pero lonxe de espertar, o Ames encaixaría o 1-4 tras un saque de banda que é prolongado por un atacante do Vila de Ordes, para aparecer o segundo dianteiro desde o segundo pao sorprendendo co seu remate en semifallo a Diego e a Juan. En todo este tempo, os visitantes chegarían con algún que outro balón en longo, e o Ames pouco a pouco foise sacudindo o agobio do Ordes adiantando as liñas e presionando máis no medio. A relaxación dos visitantes cun resultado tan holgado permitiu a reacción amiense. Preto da media hora Diego reducía distancias cun potente lanzamento de falta que se colaría pegadiño ao pao do porteiro, que nada puido facer ante o forte disparo do central local. O Ames seguiría apretando, e Neo puido anotar tras un cabezazo que atallou sen demasiados problemas o gardamallas ordense. O 3-4 chagaría nas botas de Miki, que rematou a porta vacía no segundo pao, logo de que Neo peinase un saque de banda anticipándose ao porteiro. Foron os mellores momentos do Ames no partido, pero chegou o descanso. Co inicio do segundo tempo, o Ames relaxou un pouco a súa intensidade, e o Vila de Ordes arrimouse de novo á área local. Nos primeiros minutos houbo varias ocasións sen demasiado perigo para ambos conxuntos. Os visitantes colleron algo de tranquilidade cando anotaron o 3-5, sobre o minuto 60. Unha falta lateral foi cabeceada en posición moi dubidosa por un dos xogadores do Vila de Ordes, case "a bocajarro". O Ames puido anotar o cuarto pouco despois, pero o remate de Fran, dentro da área e algo escorado, golpeou o lateral da rede. Miki tamén puido anotar un lanzamento de falta, pero o seu disparo saíu algo desviado. O Vila de Ordes estivo a piques de marcar en dúas contras, ambas chegando desde a banda e centrando á área, onde apareceu Diego para despexar (case marca en propia meta nos dous despexes). O 3 a 6 definitivo chegaría ben entrada a segunda parte, nun claro fóra de xogo do atacante do conxunto ordense, tras un pase interior ao que a defensa local saíu ben, aínda que o árbitro non o interpretase así. Juan non tivo nada que facer ante o remate do xogador visitante. Ao final, derrota contundente que castigou o mal inicio do Ames.