Un mal inicio do Ames dalle os tres puntos á Luaña (3-2)

O Ames volveu caer no mesmo erro de sempre, un mal arranque, e acabouno pagando na recta final do encontro. O Ames non estivo nos primeiros quince minutos. A Luaña, con balóns en longo, pisou área máis do debido, e nunha internada desde a esquerda, un tiro cruzado preto da área pequena adiantaba ao conxunto local. Pouco despois, unha reviravolta do ariete local, colouse arriba polo primeiro pao. Co dous a cero, o Ames deuse conta de que ou poñía o mono de traballo, ou ía saír goleado. Adiantando as liñas, comezou a tocar en medio campo e cara ás bandas, e chegaron accións de perigo. A piques estivo de reducir distancias en tres córners consecutivos, nun remate de Fran e en varios rexeites. A Luaña apenas chegou máis á área local, tan só nun par de faltas laterais e nunha falta desde a frontal. O estado do terreo de xogo, moi encharcado, dificultaba as xogadas combinativas, escasas na primeira metade. Na reanudación, o Ames saíu decidido a buscar un gol. Comezou a tocar no medio e no lado esquerdo, onde o terreo estaba mellor, contando coa opción do cambio de xogo á dereita, onde estrou moi ben Coleguín. Gañou novamente terreo e fíxose dono absoluto do encontro. A Luaña comezou a achicar balóns e apenas chegaba arriba. Nito avisou nun libre indirecto que desviou o porteiro e cuio rexeite Coleguín non acertou a rematar. O Ames reduciu distancias pocuo antes de mediada a segunda parte, nun balón que quedou medio morto na frontal (andaba Nito polo medio, igual hasta lla dou el e todo!!), Llello colocouna rasa polo primeiro pao e deulle alas aos visitantes. Tralo gol, houbo dez minutos de ir e vir, ata que o Ames volveu coller aire e a trenzar xogadas de toque pola esquerda. Nunha desas, Llello centrou ao segundo pao, e Coleguín, grande de Ventosa, rematou de cabeza abaixo ante o estupor do porteiro, que dando unha patada ao aire, viu como se lle colaba o esférico ao seu carón. Co dous a dous, o Ames seguiu empuxando. Nito peinou desviado un córner, e Roi enganchou unha bolea tras falta colgada por Miki que se foi por pouco. E chegou o gol da Luaña. Unha pérdida de balón no lado esquerdo do ataque visitante, derivou nun balón longo que deixou ao atacante man a man con Fran e Juan. Na saída deste, o dianteiro picou o esférico dándolle a victoria ao seu equipo. Aínda houbo tempo para o empate, pero Diego non acertou nunha falta na frontal que enviou á barreira, e cuio rexeite lanzou frouxo; e o árbitro non acertou a ver penalti nun empurrón claro a Diego por parte dun defensa que se desentendeu da xogada, cando o seu porteiro ía cara o esférico. Ao final, 3-2 inxusto que deixa ao Ames oitavo.