O Ames retorna á senda da victoria cunha goleada ante o Tordoia B nun bo partido (4-1)

O Ames volveu gañar e fíxoo con contundencia e con tramos de moi bo fútbol, ratificando a boa liña que o equipo segue desde fai unhas cantas xornadas. Pronto se viu que o Ames ía levar o peso do encontro, tralos primeiros minutos de tanteo. Apareceron tímidas xogadas trenzadas que inquietaron ao meta visitante, e o Tordoia B fixo algunha chegada de escaso perigo. O Ames adiantouse mediada a primeira parte cun bo gol de Llello, o primeiro dos tres que faría. Aproveitou un balón botando na área tras un bo pase de Miki para lanzar un disparo raso, cruzado e potente que bateu á meta do Tordoia. Co un a cero, o Ames tomou un pequeno respiro e os visitantes tiveron un par de contras de certo perigo. Tamén os amienses colgaron un par de córners e faltas laterais que non acabaron de concretarse en ocasións. Preto do remate da primeira parte, o colexiado sinalou penalti a favor do Tordoia B. Manuel saltou antes de tempo para despexar un balón, e cando chegou ao chan, o dianteiro visitante caeulle enriba, e sorprendentemente o xuíz interreptou penalti. O Tordoia B empatou desde os once metros. Na segunda metade, o Ames saíu decidido a levarse o encontro. Axustou mellor a liña defensiva (desde o inicio xogouse con tres defensas) un par de metros máis adiante e presionou aínda máis ao seu rival, roubando máis o esférico e chegando con moito máis perigo. O segundo gol foi unha verdadeira obra de arte. Nunha transición defensa-ataque na que participou case todo o equipo con toque rápido e apoios en corto, o balón chegou a Miki na frontal da área, algo escorado cara á esquerda. Cun regate cola de vaca "a lo Romario" desfixose do defensor e meteuse na área, centrou ao segundo pao, onde aparaceu Llello para rematar cun cabezazo cruzado ao fondo das mallas. Xogada combinativa que deu vantaxe ao Ames. Tralo dous a un chegaron os peores momentos dos locais. O Tordoia B buscou o empate á contra, e o Ames seguía chegando con boas combinacións. Nestes minutos de perigo, erixiuse unha figura clave na defensa local. O xuvenil Manuel, sublime no cruce e na cobertura, salvou ao Ames con tres accións case consecutivas nas que evitou o remate dos atacantes visitantes. Tras estes dez minutos de agobio, o Ames sacudiuse da presión con homes de refresco e co terceiro gol. No mediocampo, Chete recolleu o balón, amagou o pase a Miki na dereita e tras recortar en seco, habilitou a Llello no lado contrario cun fermoso pase. O ariete conseguiu o terceiro da tarde cun remate polo primeiro pao. Co tres a un, o Ames chegou e chegou e a goleada puido ser maior. Nito lanzou unha falta directa ao longueiro, e o rexeite foi rematado a gol por Juansiño co xeonllo. Acto seguido, un córner foi rematado a bocajarro por Nito e rexeitado polo porteiro in extremis. Ao final, victoria contundente que reforza a moral do Ames na recta final da temporada.