O Deixebre superou ao Ames cunha pizca de fortuna (2-0)

O Deixebre aliouse coa fortuna para derrotar ao Ames nun encontro bastante igualado no que
os amienses puideron sacar cando menos un punto logo do exposto no terreo de xogo. O inicio do encontro amosou que ía ser intenso pero tamén desvelou que o Ames estaba no partido. As primeiras chegadas do Deixebre foron despexadas con orde e contundencia pola defensa visitante, o que provocaba contras perigosas para o Ames con Juansiño, Llello, Pose e Coleguín como artífices. No minuto 15 chegou a xogada polémica. Nun centro desde a esquerda, un atacante local recibiu o balón en posición dubidosa, centrou e atallou Fuentes, con tan mala sorte que se lle escapou o balón un nada, e chegou outro atacante do Deixebre, que en clara falta ao porteiro, rematou o balón cara o fondo das mallas. O gol subiu ao marcador, pero o Ames refíxose de seguido, e comezou a apretar en ataque ao conxunto local. As mellores oportunidades do primeiro tempo foron para o Ames. Llello (ou Pose?) disparou desde a esquerda case sen ángulo rozando o longueiro. Diego rematou de chilena un rexeite nun córner e un defensor local acertou a despexar de cabeza cando o balón ía para a meta, e Miki disparou desde fóra da área con máis susto que perigo. Por parte do Deixebre, un par de remates desviados e pouco perigo real. Na reanudación o encontro seguiu polos mesmos derroteiros, co Ames saíndo en contras perigosas e co Deixebre contundente atrás e chegando a contagotas adiante. Diego puido empatar nunha falta desde a frontal que saíu lambendo o longueiro. Pero a fortuna volveu estar de cara do Deixebre, que nunha xogada pola banda dereita marcou o segundo gol. O centro do mediocampista local envenouse de tal xeito que cun pouco de rosca, colleu a Fuentes despitado, e colouse polo segundo pao, dándolle ventaxa de dous goles ao Deixebre. Pese ao gol, o Ames seguiuno intentando, aínda que comezaron a quedar máis ocos no mediocampo. A oportunidade máis clara foi un gran remate de cabeza de Pose, que rexeitou o gardamallas local nunha gran intervención. O rexeite foi cara Fran, que non deu reaccionado a tempo, e só puido tocar o balón coa cabeza. Juansiño aproveitou un bo pase desde a defensa para colarse en diagonal dentro da área, pero o seu disparo en semibolea ao primeiro pao, foi rexeitado polo meta do Deixebre a córner. Os da casa puideron facer o terceiro en dúas ocasións. Nunha delas, a Fuentes escapóuselle o balón cando o tiña debaixo súa, pero o atacante local precipitouse e lanzou rozando o poste a meta vacía. O mesmo atacante controlou ben na área un centro desde a banda, pero Miki xogouse o tipo para estorbar o xusto e despexar o balón ao tempo que remataba o rival. O final quedou empañado pola expulsión de Roi tras reaccionar a un par de patadas duras dun rival con outra que todo o mundo viu, e pola posible lesión do noso Moncho, que recibiu unha falta de cando menos cartón laranxa que o deixou coxeando. Con esta derrota, o Ames sitúase noveno con sete puntos. Os mellores do encontro e os que recibirán puntos bonus foron Miki, Diego e Juansiño.