Derrota pola mínima en Dubra nun partido trabado (1-0)

O Ames non puido saír de Dubra cun punto nun encontro no que o 0-0 debeu ser o resultado final. Foi un partido típico co Dubra, deses no que nos contaxiamos do mal xogo rival, e deses no que os balonazos longos do porteiro local non deixaban saír á defensa. Pese a todo, o Ames planteou un partido serio e correoso, sen alardes, facendo o xusto para sacar cando menos un empate. As chegadas do Dubra producíanse neses balonazos en longo aos dianteiros, e as do Ames nalgunha que outra contra sen demasiado perigo. Do primeiro tempo podemos destacar un disparo do Dubra B ao longueiro, aínda que máis que disparo, foi un rexeite. Dani detivo o tiro do atacante local, e o rexeite, tras botar saíu repelido polo longueiro, sen máis perigo. Por parte do Ames, Roi intentouno desde fóra da área pero o seu remate saíu desviado. A mellor ocasión do partido tamén a tivo Roi, que cabeceou un centro de Diego, pero o remate foi ás mans do porteiro. Na segunda metade, máis do mesmo, aínda que o Ames mellorou un pouco o seu xogo. Pero este pronto se volveu diluír, en parte polo estilo de xogo dos locais, que evitan que o balón pase polo mediocampo. E nunha desas, chegou o único tanto do partido. Unha contra na que non se puido derribar ao mediocampista que conducía o esférico, este abriuno á dereita, e o lateral, incorporado ao ataque, lanzou un disparo raso e cruzado. Dani rexeitou o esférico, pero un atacante local chegou desde atrás empuxando o balón ao fondo das mallas. Demasiado premio para o exposto por ambos conxuntos. Iso si, haberá que seguir mellorando.