Goleada do Ames sobre o Deixebre para rematar a Liga na undécima posición (4-1)

O Ames rematou a Liga cunha victoria contundente sobre o Deixebre que se xestou na recta final da segunda metade. O partido comezou cos dous equipos tanteándose, sen moito xogo e con tímidas chegadas. O Deixebre lanzou un par de contras perigosas e nunha delas, Diego saíu ao cruce do atacante visitante e no seu despexe, o dianteiro caeu ao chan dentro da área. O colexiado, moi alonxado da xogada, sinalou penalti sen dubidalo, nunha decisión moi discutida polos xogadores do Ames. O Deixebre adiantouse e o Ames encheuse de nervios. Pero pouco a pouco recuperou o sitio e foi chegando con perigo. Miki intentouno cun disparo lonxano que atallou o gardamallas visitante, e máis tarde nunha reviravolta na área que despexou un defensor. Tamén Nito e Roi tiveron varias combinacións preto da área que non se acabaron de concretar. Diego e Adrián puideron facer o empate nun córner e nun saque de banda longo de Gamarra, pero a defensa visitante tapou "in extremis" os seus remates. O Deixebre seguiu chegando con contras perigosas, pero sen demasiado perigo. Na reanudación, o Ames cambiou de esquema, pasando a un 3-4-3 que se convertía nun 5-4-1 en defensa. Pero esta variante apenas fixo falta, xa que o Deixebre adicouse na segunda parte a meter balóns en longo a través do seu porteiro. En cambio, o Ames controlou o esférico e comezou a crear perigo pouco a pouco. O empate chegou tras un centro de Miki a perna cambiada que Neo cabeceou ao fondo das mallas. Co gol, o Ames seguiu atacando pero sen descuidar a zaga. O segundo gol tamén levou a firma de Neo. Recibiu o balón de costas e dentro da área. Tras un amague meteuse cara o interior e disparou á escadra da portería do Deixebre, nun gol de moi bela factura. Nos últimos minutos chegaron os outros dous goles do Ames. O terceiro tras unha gran xogada combinativa entre Neo e Miki, que habilitaron a Nito dentro da área. Este disparou e o seu remate rozou a un defensor, colándose na meta. O cuarto gol chegou logo dun saque de falta rápido de Miki. O rexeite foi aproveitado por Juansiño, que anotou a pracer na área pequena. Con esta victoria, o Ames finaliza a Liga na decimoprimeira posición con 25 puntos.