Derrota contundente do Ames en Tordoia (4-0)

O Ames viaxou o pasado domingo a Tordoia con vistas a sacar un bo resultado que lle permitise auparse un par de postos na táboa antes do remate da Liga. O equipo comezou ben plantado, con chegadas tímidas, e repelindo os ataques do conxunto local. Pero pronto o Tordoia se adiantaría no marcador, tras un par de rexeites que deixarían só ao atacante local fronte a un Juan que nada puido facer. A partir de encaixar o gol, o Ames iríase do encontro, encaixando moi pronto o segundo gol tras outro balón morto na área. Os visitantes intentaríano tímidamente cun disparo lonxano de Miki, e con algún que outro centro que non atoparía rematador. O Tordoia faría o terceiro tras un erro de Diego na saída do balón, que se confiou dándolle a vantaxe ao ariete dos locais. Este chegou á liña de fondo e o seu centro foi rematado tras un par de pases a gol. O cuarto chegaría preto do descanso, novamente tras aproveitarse dos erros defensivos do Ames. Na reaundación, e co encontro sentenciado, o Tordoia viviría das contras e o Ames intentou xogar o balón con criterio, e así o conseguiu nalgunhas xogadas de perigo. Pero en ningún momento houbo acerto no remate, todo foron boas intencións que se quedaron en nada. A destacar un disparo lonxano de Adrián e un par de internadas de Juansiño que xeneraron perigo. O domingo, último encontro de Liga ante o Deixebre en Castiñeiro ás 4 e media da tarde.