O Resmón derrotou ao Ames no primeiro encontro do ano (3-1)

O Ames afrontaba o primeiro encontro do ano coa idea de truncar a mala tendencia da primeira volta e comezar o 2010 con bo pé. O partido comezou cos dous equipos ben plantados e tanteando ao rival. Tras un par de chegadas sen perigo por parte dos dous conxuntos, o Resmón adiantouse nun desaxuste defensivo dos amienses. Un mal despexe deixou a un dos atacantes locais con vía libre para adentrarse na área. Cun disparo alto pero non moi colocado, o dianteiro do Resmón batía a Juan, que se quedou a media saída. Como soe ocorrer tras encaixar un gol, o Ames botouse cara arriba e comezou a chegar con maior frecuencia, e certo con perigo sobre todo a balón parado. Os saques de banda de Gamarra tamén trouxeron algunha que outra internada na área local, pero non se acababan de fabricar ocasións. O empate chegou nun córner. Miki aproveitou un rexeite preto do punto de penalti, para lanzar un tiro cruzado pretiño do poste, establecendo a igualada. O Ames relaxou un pouco a súa presencia no ataque local e acabouno pagando caro. Coas liñas algo desaxustadas, o Resmón aproveitou un novo rexeite da defensa a tres cuartos de campo para anotar o segundo gol. Un dos atacantes do conxunto caseiro pillou unha bolea que sorprendeu a Juan, tras un bote un tanto extrano. O segundo gol suporía un golpe difícil de dixerir para o Ames, que pese a todo puido facer a igualada cun remate de Manuel desde fóra da área, e un rexeite de Miki noutro córner que morreu pola liña de fondo. O Ames encaixaría o terceiro antes do descanso, nun lanzamento de córner que se envenenou e que se acabou colando na meta amiense. Na reanudación, o Ames saíu decidido a buscar a remontada e meteu ao Resmón no seu campo. Pese a isto, apenas se creaban ocasións en xogada, e novamente o perigo chegou a balón parado.Un par de faltas desviadas (nunha delas o Ames reclamaría penalti por unha clara man na barreira), e un par de rexeites illados nun córner. Aproveitando o empuxe do Ames, o Resmón chegaría en varias contras perigosas, que ben a defensa ou ben Juan acabarían desbaratando. A mellor ocasión do Ames estivo nos pés de Diego, que nun rexeite tras unha falta lateral e co porteiro no chan, mandaría o esférico uns centímetros por riba do longueiro. Así as cousas, o Ames non sería quen de remontar, quedando con 7 puntos na penúltima posición da táboa. A vindeira semana, derbi ante o Costoia en Castiñeiro do Lobo.