O Ames puntúa en Rial pese ás numerosas baixas (1-1)

O Ames afrontou o encontro contra o Rial con numerosas baixas: ás lesións de Cool, Llello (que xogou 5 minutos para probarse) e Juansiño sumáronse as sancións de Chete e Moncho e a recente baixa no mercado invernal de Pose. Con doce xogadores e Llello tocado, o Ames saltou ao campo cunha idea clara, facer un partido práctico, arroupadiños atrás e saíndo á contra. O balón parado foi a principal baza dos amienses. O encontro comezou cos dous equipos tanteándose. O Rial levou a iniciativa con balons en longo ás bandas, e escaso perigo, e o Ames saía a contra con timidez e aproveitaba as faltas para ter presencia en ataque. A primeira ocasión foi unha falta lonxana de Miki, preto do mediocampo, que probou ao porteiro do Rial, sempre adiantado. Debido á distancia do lanzamento, o meta agarrou o esférico sen problemas cando este se achegaba cara a escuadra da súa portería. Mediada a primeira parte, o lateral dereito do Rial sumouse ao ataque, e nun centro chut sorprendeu a Juan cun gran disparo que se colou pola escuadra do segundo pao. Co gol en contra, o Ames presionou máis arriba e comezou a ter máis chegadas. Un par de balóns en longo a Coleguín e Adrián foron os primeiros avisos. O máis serio, e a mellor oportunidade do Ames, foi un lanzamento de Roi. Este colleu o balón cinco metros por diante do mediocampo, viu adiantado ao meta local, e cun disparo potente estivo a piques de empatar, pero a estirada do porteiro evitou o gol. Pouco despois chegou outra das boas oportunidades do bando visitante. Nun balón morto na área, Adrián disparou frouxo coa dereita estando de costas á portería local, e o rexeite dun defensor caeulle a Fran, que lanzou fóra coa esquerda. E os avisos do Ames deron os seus froitos nunha das últimas xogadas do primeiro tempo. Miki sacou un córner desde a dereita, Diego entrou só detrás de Roi e enganchou un cabezazo potente que rexeitou o porteiro. Coa inercia do remate, Diego chegou ao rexeite e anotou o empate. Na reanudación, o Ames saíu igualmente rezagado e con chegadas puntuais á contra, e o Rial diluíase en balóns longos sen perigo. O partido foise embarullando e o Rial só lanzaba balons en longo desde a meta que rara vez atopaban destinatario, e o Ames facía acto de presencia arriba novamente a balón parado. Mediada a segunda parte un xogador do Rial deulle unha patada fóra de lugar a Pi, sen estar o balón de por medio e viu a tarxeta vermella directa. Nos seguintes quince minutos non houbo nada de fútbol, e ambos conxuntos perdéronse en protestas e faltas que non levaban a nada. O Ames acusou a falta de homes de refresco, algo que si fixo o Rial. Pero os seus recambios só aportaron certa frescura, pero ningunha idea en ataque, polo que o partido transcorreu do mesmo xeito. Os visitantes sen problemas atrás, e o Rial intentando chegar con balóns longos que se ían fóra. Miki intentouno para o Ames nunha falta lateral que se cerrou e atallou o porteiro no primeiro pao. Coleguín entrou ben nun par de ocasións pero colexiado viu fóra de xogo en ámbalas dúas. Ao final, empate xusto, aínda que o Ames deu máis sensación de poder levarse o encontro.