O Ames derrota ao Paraguayo Santiago nun encontro duro que se decidiu a balón parado (1-0)

Tras dúas derrotas consecutivas a domicilio, o Ames acadou este domingo a segunda victoria da temporada (a segunda en Castiñeiro do Lobo) ante un rival novo na categoría que aínda non coñecía a derrota. O encontro foi intenso e con tramos de pouco fútbol. Ningún dos equipos se facía dono do esférico, e o Paraguayo Santiago comezou a empregarse con certa dureza. Iso si, o colexiado apareceu sempre aplicando o regulamento con xustiza. Pouco a pouco o Ames foi levando máis a iniciativa no xogo e achgándose á área rival. Miki probou fortuna a balón parado en posición lonxana, e o seu remate saíu a centímetros do poste. O conxunto visitante só chegaba nalgún córner e en balóns colgados á área, sempre sen demasiado perigo. O Ames puido adiantarse tras un remate de Neo logo dun centro de Adrián, pero o balón foise alto. Pouco despois chegou unha das xogadas clave do encontro. O colexiado ensinoulle a segunda amarela ao capitán visitante ao non seguir as súas indicacións de quitar os aneis e obxectos perigosos, aviso que deu antes de comezar o encontro. Antes do descanso, Roi puxo en apuros ao conxunto visitante, cun remate que pasou preto do poste. Na segunda metade, o partido converteuse nun ir e vir, e ao pouco de comezar o Ames adiantouse no marcador. Miki lanzou unha falta sen demasiada colocación, o porteiro non atrapa ben o balón, e aparece Fran para fusilar ao fondo das mallas coa perna esquerda, situándose coma o pichichi do Ames en liga. O Ames puido ampliara súa vantaxe pouco despois, pero o árbitro non interpretou penalti sobre Miki nun córner botado por Adrián. O Paraguayo Santiago crearía perigo novamente a balón parado, cunha falta que pasou preto da escuadra da meta defendida por Juan. A defensa amiense estivo unha vez máis a un gran nivel, cortando os pases interiores do mediocampo paraguayo, e deixando aos seus atacantes en fóra de xogo. Os visitantes só apretarían na recta final do encontro, onde o Ames tamén puido matar o encontro. Neo provocou coa súa presión que o porteiro visitante non atallase o esférico, pero o seu remate escorado non atopou portería. O Paraguayo tería un par de chegadas no último tramo do partido, con dous balóns rexeitados polo poste que puxeron a proba os nervos da afección amiense. Finalmente, o equipo sumou a segunda victoria da temporada, situándose oitavo con 6 puntos. A vindeira semana toca un duro enfrontamento coa Sionlla. A por eles!!!