O Vila de Ordes destroza ao Ames cunha contundente goleada (8-0)

O Ames visitou o sábado o campo de Vista Alegre para mediarse a un dos candidatos ao ascenso, o Vila de Ordes. O partido comezou tolo, con tres goles do conxunto local en dez minutos, de igual xeito que comezara o encontro da primeira volta en Castiñeiro. O Ames anotaría un gol en propia meta, e logo un penalti cometido por Carba e un erro defensivo deixarían o marcador nun contundente tres a cero para o Vila de Ordes. Lonxe de reaccionar coma no encontro de ida, o Ames desesperouse e o Ordes non deixaba de facer dano polas bandas, ante unha defensa visitante moi adiantada. Isto xenerou novas oportunidades do conxunto local, que chegou ao descanso cun cinco a cero ao seu favor. O Ames saíu ao segundo tempo coa esperanza de parar o vendaval do Vila de Ordes, e o marcador mantívose igual ata o minuto 70. O Ames puido reducir distancias cun tiro ao pao de Roi e nun par de chegadas de Neo nas que non acertou a definir. O Vila de Ordes seguía chegando con moito perigo e creando moitas ocasións, anotando tres goles máis ata deixar o resultado no oito a cero final. Tan só lamentar a mala actitude unha vez máis (e xa van unhas cantas) dalgúns xogadores do Vila de Ordes, encarándose con Roi e dándolle patadas cando o árbritro non estaba pendente deles. En fin, ao final, oito a cero e a pensar no próximo partido, ante un rival directo coma a Luaña.