Victoria épica do Ames ante o Trazo (5-4)

O Ames devolveulle ao Trazo a "xogada" da primeira volta cando lle remontara un 1-2 no tempo engadido. Este domingo o equipo amiense deulle a volta a un 3-4 cando todo parecía indicar que novamente o Trazo ía levarse os tres puntos. O partido comezou co Ames ben colocado e o Trazo sen apenas chegar á portería defendida por Carba. O Ames adiantaríase no minuto 15 por mediación de Adrián, no seu primeiro gol como xogador amiense. Gamarra lanzou un saque de banda á área pequena, Miki non alcanza a peinar o esférico e Adrián chega con forza para enganchar unha volea que adianta ao conxunto local. Co gol a favor, o Ames seguiría igual e o Trazo tería un par de ocasións a través dos seus extremos. A dez minutos do descanso o Trazo conseguiría o empate, en claro fóra de xogo. Carba despexou un centro dende a banda esquerda e o rebote caeulle a un xogador do Trazo, que lanza a portería. O balón rebota novamente nun xogador do Trazo, que estaba adiantado e remata a gol. O tanto non debeu subir ao marcador xa que o porteiro amiense estaba por diante da pelota, e entre o esférico e a liña de gol só estaba Fran como único xogador do Ames. O Ames puido adiantarse antes do descanso por mediación de Juansiño, pero o seu disparo saíu desviado. Na segunda parte o encontro seguiu de forma semellante, co Ames ben posicionado e co Trazo que non daba combinado. No minuto 55 o Ames conseguiría o segundo gol. Peli provoca un penalti que Fran anota con suspense, tras dar no longueiro. Adrián case anota o terceiro despois de peinar un saque de banda que o porteiro visitante despexa in extremis. O partido transcorreu así ata o minuto 75, sen que o Trazo crease apenas oportunidades. Pero nese minuto chegaría o empate. Tras un rebumbio na área local, un xogador do Trazo remata e o balón da na man de Fran. Penalti e 2-2 no marcador. O Ames acusou o empate e pronto encaixaría o 2 a 3, tras un balón en longo que Fran e Manu non acertan a despexar e no que Carba dubida na saída. O dianteiro coloca o balón no pao longo preto da escadra. Pero dous minutos despois o Ames consegue o 3-3 nun córner que saca Miki e no que Neo consegue anotar tras adiantarse ao porteiro, que saía de puños. O cuarto gol para os locais puido chegar despois dun par de boas tringulacións ás que Nito e Juansiño non son quen de poñerlle o broche do gol. Sen embargo no minuto 88 o Trazo ía conseguir o 3-4. Miki esvara cando vai despexar e o balón recólleo un atacante do Trazo que bate a Carba, que a piques estivo de deter o remate, cun disparo raso. Pero o Ames tiña claro que non ía deixar por segunda vez que o Trazo "se saíse coa súa". Así, e casi de inmediato, Miki lanzou un novo córner que Juansiño rematou polo primeiro pao agachándose ante varios rivais, incrédulos ante o empate do Ames. Pero non ía quedar así a cousa. A falta dun minuto para o final Gamarra lanzou unha falta directa a tres metros da esquina da área, un pelín escorada. O lanzamento, potente e polo "medio e medio", sorprendeu a un mal colocado porteiro do Trazo, colándose polo fondo das mallas. Éxtasis en Castiñeiro do Lobo e 5-4 para os locais, que escalan posicións na táboa. Aúpa Ames!!!!!!!!!!!!!!!!