Victoria do Ortoño nun derbi igualado que se decidiu na segunda metade (0-2)

O Ames afrontou este domingo un novo derbi na casa, desta volta ante o Ortoño, co obxectivo de plantarlle cara ao líder e lavar a mala imaxe ofrecida nos últimos encontros. De feito, o Ames non só conseguiu plantarlle cara ao Ortoño, senón que estivo a piques de levarse o empate, e cunha pizca de sorte, incluso a victoria. O encontro foi sempre moi igualado, con fases de moito mediocampismo e o xogo moi parado debido a unha rigurosa aplicación das faltas por parte do colexiado. No primeiro tempo apenas houbo ocasións e os porteiros estiveron prácticamente inadvertidos. O Ames, todo contrario ao realizado nos últimos encontros, intentou tocar o esférico con criterio para chegar á meta rival. O Ortoño intentaríao cun par de balóns en longo do seu gardamallas, pero sen perigo. Na reanudación, o encontro continuou sendo trabado. A defensa do Ames, que volveu a raiar a un gran nivel, cortaba todo o perigo que chegaba á meta de Juan. Non puido ser así na xogada do primeiro gol dos visitantes. Este chegaría tras unha man inexistente de Paco na zona medular. O saque da falta botou preto do punto de penalti, onde apareceu un mediocampista do Ortoño para cabecear ao fondo das mallas tras un rebumbio na área. A pesar do gol, o Ames seguiría tratando ben o balón. Con todo, e coma vén sendo habitual durante toda a temporada, a ocasión máis clara dos locais chegaría balón parado. Un saque de falta desde o lateral botado por Adrián á altura do punto de penalti, provocaría un fallo dos defensas do Ortoño e o seu porteiro. Tras un rebote, o esférico chega a Adrián "Peli", que non é quen de chegar ao balón e empuxa-lo a gol. Quen sí atinaría co gol sería, por segunda vez, o Ortoño, e de novo tras unha falta inexistente. O saque da falta provoca un rexeite, e un pase entre liñas deixa a un dos atacantes visitantes só ante Juan, ao que bate facendo o segundo. Polo Ames intentaríano Miki e Casal con sendos disparos lonxanos que non atoparon portería. Así as cousas, o Ames caeu derrotado ante o líder, ofrecendo unha imaxe que nada ten que ver coa dos últimos encontros. Outra nota positiva, na segunda parte retornarían aos terreos de xogo despois dun tempo apartado deles Neo e Casal, que sen dúbida serán pezas fundamentais nos bos resultados que o Ames acadará nos próximos compromisos ligueiros. O domingo, duro compromiso ante o Paraguayo Santiago!!