O balón parado decide o derbi entre o Ortoño e o Ames (3-1)

O Ames caeu derrotado na segunda saída e no segundo derbi da temporada. O balón parado foi protagonista xa que os catro goles do encontro viñeron dese xeito. O encontro foi trabado desde o principio, con moitos paróns e pouco xogo por ambos bandos. O Ortoño golpeou primeiro, empuxando ao fondo das mallas un balón que quedou rexeitado na área tras un saque de falta lonxano. Pero o Ames, cun gran traballo defensivo (sobre todo Fran e Manuel freando aos dianteiros locais), botouse adiante e pronto lograría o empate. Nun saque de esquina botado por Adrián, Miki deu un pase ao punto de penalti, onde apareceu Fran para igualar o partido. Chegouse ao descanso con moita igualdade e co equipo mellorando a imaxe do domingo anterior ante o Costoia. Na segunda metade o guión foi o mesmo, con pouco fútbol e moito físico. Aos quince minutos marcaría o Ortoño o segundo gol, noutra falta lateral que roza Roi e na que Adrián non consegue adiantarse ao atacante local, superando a Juan co seu remate. Pouco despois de marcar o segundo, o Ortoño poría a sentencia nun remate de cabeza no segundo pao que baixaría un pouco os ánimos do Ames. A partir dese momento o partido endureceuse, sen demasiadas ocasións e con algunha entrada fóra de tono. Con esta derrota por 3-1, o Ames baixa ao décimo posto con tres puntos. O vindeiro encontro será en Castiñeiro do Lobo este domingo ás 16:30 fronte ao Paraguayo Santiago.