O Ames é apeado da Copa do Sar ante o Dodro (4-2)

O Ames visitou Dodro a pasada fin de semana co obxectivo de acceder á seguinte ronda da Copa do Sar, ante un conxunto que está a piques de descender de categoría. A cousa foi ben ata a recta final do partido, onde os locais impuxeron o seu poderío físico. Porque fútbol pouco ofreceron. Sí o Ames, sobre todo na primeira media hora, onde tivo o encontro totalmente controlado. O conxunto visitante estivo ordenado, práctico co balón, sen complicacións atrás, e con saídas e combinacións perigosas arriba. O Dodro apenas pisou a área do Ames nos primeiros minutos de encontro. Os visitantes adiantáronse mediada a primeira parte, nun pase por riba da defensa que deixou só a Llello ante o porteiro. O ariete amiense picou o esférico por riba na saída do gardamallas e adiantou ao Ames. Na recta final do primeiro tempo, o Dodro saíu un pouco cara adiante, axudado por un árbitro excesivamente caseiro, con faltitas sempre a favor dos locais, e varias amarelas rigurosas cos xogadores do Ames, mentres eles non vían ningunha, aínda que protestaban a gusto. O empate local chegou nunha falta lateral que cabecearon a gol a medias entre Diego e o rematador local. O Ames puido anotar o segundo nun par de chegadas de Llello e Nito, e en dous córners a través de Diego. O primeiro rematouno desviado e o segundo non alcanzou a rematar a porta vacía tras tirarse en prancha no segundo pao. Na reanudación, o Ames saíu coa intención de marcar o segundo, e o Dodro continuou con dificultades para xogar ao fútbol. Meteu un home alto e comezaron a lanzar balóns en longo. O Ames comezou a sufrir con tanto balonazo, xa que á defensa costáballe recuperar terreo. O segundo gol do Dodro chegou aos quince minutos da segunda parte, nun balón que un dos seus dianteiros recolleu na esquina da área, percorreu uns metros en diagonal e disparou raso á cepa do primeiro pao sen qu Juan puidese atallar. O Ames non se amilanou e puido empatar na súa oportunidade máis clara. Llello picou de novo dentro da área o esférico por riba do porteiro, pero desta volta o gardamallas puido rectificar e salvou a pelota xusto enriba da liña. O empate chegou pouco despois, nun córner que Paco rematou a gol no segundo pao tras un rexeite. Pero o árbitro sabía ben a que non debía perxudicar, e tras birlarlle ao Ames un penalti sobre Juansiño na primeira parte, non dubidou na segunda parte en pitarlle un ao Dodro. Diego intentou despexar dentro da área e o ariete local meteu a prancha, golpeando os dous xogadores o balón. En vez de interpretar plantilla e falta a favor do Ames, o colexiado sinalou unha rigurosa pena máxima que o Dodro anotou. O Ames intentou nos dez minutos que restaban buscar a igualada, sobre todo a balón parado, pero nunha contra o Dodro marcou o cuarto gol, co equipo volcado e deixando máis ocos. Ao final, o Dodro pasa a seguinte ronda, e o Ames, fastidiado de camiño aos vestiarios, aínda tivo que escoitar os insultos da grada local, que na recta final do encontro amosou moi malos modales.