Un golazo de Fran na Luaña permítelle ao Ames romper a mala racha de resultados

Por fin!! Tivo que ser o pichichi deste ano no Ames, Fran, o que salvase un puntiño para os visitantes no encontro deste martes ante a Luaña. E iso que os amienses lograron romper non só a mala racha de resultados, senón tamén a horrible xeira de inicios de partidos. Por primeira vez nuns cantos partidos o Ames chegou ao minuto 25 sen encaixar un gol. Non saían as cousas pero defendíase con xeito. A Luaña tampouco inquietaba moito, tan só en balonazos illados, aínda que adiante ao Ames costáballe combinar e chegar con perigo. Tan só un disparo lonxano de Peli, un cabezazo moi desviado de Paco e un pase de Nito a Peli que este non acertou a rematar. Polo conxunto local tan só un par de internadas por banda, finalizando unha delas cun remate que bateu no lateral da portería defendida por Juan. Pese a todo, á media hora acabaríase adiantando a Luaña, cunha gran parede entre David e Blanco, que finalizou o escurridizo extremo local cun disparo raso e cruzado que bateu a Juan. Así se chegaría ao descanso, no medio dunha peculiar arbitraxe do trencilla Don Rafael Vicente, en fin... Na reanudación o Ames tratou de adiantar liñas, subiu Miki á mediapunta, Fran situouse no medio e Diego entrou no centro da defensa. Pouco a pouco o equipo foi chegando arriba, coa Luaña encerrada atrás saíndo á contra con balonazos en longo sobre todo do seu porteiro. O Ames crearía perigo cun par de córners e con algunha internada de Nito e Roi que non acababan de xenerar oportunidades claras. O gol do empate chegaría nunha xenial bolea de Fran desde tres cuartos de campo. Tras controlar co peito en pleno xiro, golpeou o esférico con moita potencia e este saíu disparado cara á meta nunha "folha seca" que se colou pola escuadra da meta local. Co empate, o Ames aínda tería tempo para un par de ocasións, a máis perigosa un lanzamento de falta de Diego que se foi cerrando e estivo a piques de sorprender ao porteiro da Luaña. Tamén os locais puideron levarse o partido, primeiro nun barullo na área que acabou despexando Iván na liña de gol, e logo nun triple remate nun córner que entre Chete, Nito e Juan acertaron a despexar. Ao final, empate xusto que permite ao Ames truncar a súa mala racha de resultados. O domingo, a recibir ao Tordoia!!