Derrota contundente do Ames fronte ao Costoia na segunda xornada ligueira (6-0)

O Ames sufriu un duro revés na súa visita ao Municipal de Bertamiráns para enfrontarse ao Costoia no segundo encontro de liga. O partido xa tivo un inicio un tanto extraño, non só polas moitas baixas do Ames, senón tamén pola actitude un tanto chulesca do árbitro, que requiriu o inicio do partido ás 4 cando estaba previsto para as 4 e media por orde federativa. Así se reflicte nos últimos acordos enviados aos clubes pola Delegación de Santiago da Fegafut: "o Club Costoia xogará como local no Campo Municipal de Bertamiráns en horario de calendario", que neste mes é ás 16:30 horas. En fin, unha cafrada máis dun colexiado que fixo quentar apurados aos equipos e empezar o partido a toda presa. Xa no campo, o Ames recibiu pronto o primeiro gol, tras unha internada desde a esquerda que rematou nun centro rematado a gol por un atacante local. O Ames puido empatar tras unha falta colgada por Nito que Fran cabeceou ao longueiro, sen que ninguén acertase a empuxar a gol o rexeite. Pouco despois o Ames iríase do partido ao encaixar dous goles case consecutivos. Primeiro tras unha indecisión na zaga visitante, e logo tras un tiro lonxano. O Costoia anotaría o cuarto gol antes do descanso tras un centro desde a esquerda que finalizou nun remate a gol. O quinto puido chegar antes do descanso, pero o colexiado anulou un gol de falta dos locais ao entender que era un lanzamento indirecto, e a pesar de que Juan tocou o balón antes de que entrase na portería. Na reanudación, o Ames cambiou algo a cara e tivo máis chegadas arriba, deixando menos ocos para o Costoia. O encontro endureceuse e Juansiño foi expulsado tras protestar unha decisión arbitral. Co encontro roto e o Ames desquiciado pola lamentable actuación arbitral (que para nada xustifica o resultado), os visitantes puideron reducir distancias tras sendos saques de falta de Adrián que Paco rematou sen demasiado perigo. Nito puido marcar nunha xogada na que quedou só tras recibir o balón dun contrario, pero o colexiado anulouna. O Costoia remataría o encontro con dous goles máis co equipo moi desconxuntado. Roi puido maquillar o resultado ao final, pero golpeou mordido e non puido bater ó gardamallas local. Con esta derrota, o Ames sitúase noveno con tres puntos, a espera de ofrecer unha mellor imaxe na seguinte xornada. A seguir traballando rapaces!!